نمت امبارح متأخر وأنا سعيدة وصحيت بدري لوحدي على صوت الأولاد بيلعبوا في هدوء على غير العادة! منغير الغلاسة المعتادة
“اصحي يا ماما، قومي دلوقتي حالاً” “طب خمس دقايق وحاقوم” “لأ دلوقتي يعني دلوقتي” “انتي كده اللي حاتأخرينا”!
قمت لقيت الوقت بدري جداً على غير عادتي لما بنام متأخر.. لقيت ابني الكبير جاب بطاطا في طبق وقعد يفطر 
والصغير قاعد على الكمبيوتر بيلعب ..
صليت على غير العادة .. وشربت شاي بلبن برضه على غير العادة (عادة بنجري ومش بالحق أعمل اللي المفروض أو اللي عايزة أعمله
مخدوش وقت ولا معاناة كل يوم في لبسهم
وبعدين لقيت ابني الصغير ابتدى يغني لي أغنية حب وسعادة
I love you
You love me
We’re a happy family
With a big big hug
And a kiss from me to you
Won’t you say you love me too
أنا بحبك
وانت بتحبيني
إحنا أسرة سعيدة
بحضن كبير
وبوسة مني ليكي
قولي لي إنك انت كمان بتحبيني
قعدنا نغني الأغنية مع بعض ثم اشترك معنا ابني الكبير، وفي كل مرة يديني حضن وبوسة مع الأغنية
لما وصلنا النادي أصر يودعني بالأغنية برضه .. قدام الناس! هم مش كتير ولا قريبين بس برضه
“بلاش فضايح يا زين.. الناس مش متعودة تشوف حب وسعادة مجتمعين مهما كانت الأطراف المعنية.. “
طبعاً مقلتلوش كده! وقمت بالواجب للحماية اللازمة
أنتما في حفظ الله، وأدوات حفظ تانية
ربنا يبارك لك فى ولادك
حقيقى تدوينة عائلية مبهجة
زرت مدونتك لأول مرة
وواضح إنك دايسة فى التدوين من زمان
وحقيقى لذيذة ولها طعم حلو مختلف
تقبلى خالص ودى
أشكرك
مش عارفة ليه الوورد برس مش بيتيح رابطة لمن يعلقون على التدوينات ..