اللي بيحصل في مصر مش جديد ، البلطجة وعدم الاحترام والتعدي على حقوق المواطنين ومعاملتهم أقل من المعاملة التي يستحقها الحيوان (معذرة) موجودة في مصر لا جديد في ذلك كله سوى أنه أصبح على مرمى البصر وفي الميدان العام واللي مكنش عارف عرف واللي مكنش عارف اتصدم بس اتصدم لأنه مكنش عارف مش لأن اللي بيحصل ده جديد وطبعاً إحباطنا وقصقصة ريشنا هو المطلوب لذلك ينبغي عدم الاستسلام لمشاعرنا السلبية تجاه الأحداث وعدم الاحباط من أمر يتكرر كل يوم وكان يتكرر على مدى عقود إن لم يكن قرون
للأسف أنا لما باسمع أي خبر من الأخبار الشائعة اليومين دول يثيرني الغضب ولكن ليس إلا لثوان أو دقائق أو ساعات معدودة بعدها لا أكاد أتذكر شيء .. إيه الجديد يعني؟؟ الجديد اللي المفروض يكون هو إننا نتحرك نعمل حاجة مش نقعد نتفرج مكتفين الأيدي والأرجل والعقول، طبعاً السؤال حايكون وحانعمل إيه يعني؟؟ والإجابة المتواضعة جداً من وجهة نظري هي أن يفعل كل فرد ما في إمكانياته ولو على المستوى الفردي لأننا لو فكرنا في الصورة الكبيرة وفكرنا في عجزنا عن التغيير.. خلاص خلص الموضوع وأصبحنا محبطين بلا قيمة ولا عمل ولا دافع للحياة أو التغييرإذا وجد كل فرد عمل ما ولو صغير جداً يستطيع أن يغير ما في نفسه قبل الآخرين أعتقد أن هذا هو المطلوب لأن التغيير في الذات ينعكس على الأفراد الآخرين وبالتالي المجتمع.. ده كله طبعاً نقطة في مية بس هو ده اللي في إيدينا من وجهة نظري.. نقطة في مية أحسن ولا إحباط وفقد القدرة على العطاء والعمل؟؟
إحنا دلوقتي كبشر وليس كمصريين في مرحلة انتقالية يظهر فيها الكل على حقيقته الوحش بيبان أكتر والكويس برضه بيبان أكتر والصراع بيزيد بسبب علانيته والفجوة تزيد وعلى كل واحد يلحق نفسه بأخذ الموقع الذي يريده، دلوقتي كل حاجة بتبان على حقيقتها وده مش معناه إن اللي بيحصل ده جديد ولكن فقط يظهر على السطح وعلينا ألا نستسلم للإحباط الذي يمكن أن يصيبنا بسبب هذه المرحلة فقط أن يبحث كل منا عن دوره ولا يتخلى عنه… خليها على الله .. الكلام ده يجوز ويبقى له المعنى اللي ربنا أراده بعد ما نعمل اللي علينا وما في وسعنا .. مش نقعد نتفرج ونقول إحنا حانعمل إيه يعني .. خليها على الله… يعني نخربها ونقول خليها على الله؟؟؟ ده كلام ده .. لازم نعمل اللي علينا ومانخفش وساعتها نقول خليها على الله عشان يساعدنا ويساندنا في اللي بنعمله
